Bachchon! Hazrat Musa Alaihissalam ke intiqal ke baad Banu Israil ki bahut tarakki hui, iske baad aahista-aahista inmein ikhtilaf paida ho gaye aur Allah Ta'ala ke bataye hue sahih rasta ko bhoolte gaye, Banu Israil ki hidayat ke liye Allah Paak ne aur kitne Nabi bheje jo Hazrat Musa Alaihissalam par nazil ki hui kitab Taurat ki taleem dete rahe aur Banu Israil ko fir seedhe raste par lagate rahe, Hazrat Ayub Alaihissalam bhi unhin Paighambaron mein se ek hain jo Banu Israil ko Taurat ki taleem dene ke liye tashreef laye the.
Hazrat Ayub (A.S) ki Khush-hali
Hazrat Ayub Alaihissalam Allah Ta'ala ke bade sabir Paighambar guzre hain, aapka zikr bhi kai jagah Quran Majeed mein milta hai, aap bade hi maaldar khush-hal the aur aapki bahut si aulad thi, aap Allah Ta'ala ki un nematon par har waqt shukr ada karte the, har taraf khushi hi khushi thi, ranj w gam, fikr w andesha ka kahin door-door tak naam w nishan nahin tha.
Sabr ka Imtihan aur Aazmaish
Aakhir aapki aazmaish ka waqt aa gaya taki Allah Ta'ala ke sacche bandon ki nishani rehti duniya tak qaim rahe, aur sabr w shukr ki misalein hamesha zinda rahein, Allah Ta'ala ne ek-ek karke apni nematein wapas lena shuru kar di, maal w daulat, baagaat, sabzazar, khet, makanat, janwar, aulad sabke sab rukhsat ho gaye, aur aakhir mein sehat ne bhi jawab de diya, badan mein keede pad gaye, sara badan phat gaya magar aap in sab musibaton par bhi Allah Ta'ala ka shukr hi ada karte rahe, Allah Ta'ala hi ki yaad mein lage rehte, shikwa shikayat tak na karte nashukri ka zikr hi kya !.
Shifa aur Dobara Khushiyan
Sabr ki bhi ek had hoti hai, jab iska paimana labrez ho gaya to unhone apne Rab ko pukara, aur faryad ki, mujhe Shaitan ne ranj aur takleef pahuncha rakhi hai tu mere haal par raham kar ki tu hi sabse ziyada raham karne wala hai aakhir Allah Ta'ala ko unke haal par raham aaya usne hukm diya ki tum apne paanv se zameen par thokar maaro.
Thokar maari to ek chashma nikla, jab wah is paani se nahaye aur isko piya to unki tamam bimariyan door ho gayin aur iske saath hi Allah ne yah bhi ehsan kiya ki unko fir tamam nematein aur barkatein bhi di, aur biwi bacche bhi inayat kiye.
Beshak Hazrat Ayub Alaihissalam bade sabr karne wale the, kya hi acche bande the jo har baat mein Allah hi ki taraf daudte the.
Allah Ta'ala hum sab ko har aazmaish aur har imtihan se bachaye lekin agar kabhi koi musibat aa jaye to isko Allah Ta'ala ki taraf se apne bure kaamon ka ek imtihan samajhna chahiye aur Allah ke pyare Nabi Hazrat Ayub Alaihissalam ki tarah sabr karna chahiye aur is haal mein Allah Ta'ala ka zikr aur uski tareef karni chahiye ki yah bade insano aur bade sacche bando ki nishani hai, Allah Paak hum sab ko sabr w sabat aur har haal mein apne Malik Haqeeqi ki tareef karte rehne ki taufiq ata farmaye Aameen.
Sawal Jawab (FAQ)
Jawab: Aap apne "Sabr" (Patience) ke liye puri duniya mein mashhoor hain.
Jawab: Allah ke hukm se unhone zameen par paanv mara, jisse paani ka chashma nikla, usse nahane aur peene se wo theek ho gaye.
Jawab: Unhone kabhi shikayat nahi ki, balki har haal mein Allah ka shukr ada karte rahe.