Hazrat Musa Alaihissalam Allah Ta'ala ke bahut bade Rasool guzre hain, aap par Taurat Sharif nazil hui unki qaum jinhein is waqt Yahoodi kaha jata hai, unhin Bani Israil ki hidayat aur nijaat ka kaam aapke supurd hua, Quran Paak mein aapka baar-baar zikr aata hai, isliye is qisse ko khol kar bayan karna chahte hain, Hazrat Ibrahim Alaihissalam ka qissa to aap pehle sun chuke hain.

Hazrat Ibrahim Alaihissalam ke do bete bahut mashhoor hue hain, Hazrat Ismail Alaihissalam, aur Hazrat Ishaq Alaihissalam, Hazrat Ismail Makkah Mukarramah mein thahre jahan Hazrat Ibrahim Alaihissalam unki walida ke saath chhod aaye the jahan unki aulad khoob phooli phali, unhin mein hamare Rasool Paak Janab Muhammad Rasulullah Sallallahu Alaihi Wa Sallam paida hue, Hazrat Ishaq ke bete Hazrat Yaqub Alaihissalam the, jinka dusra naam Israil yani Allah ka banda tha, unki aulad Bani Israil kahlai yah log Hazrat Yusuf Alaihissalam ki wajah se Misr mein aabad ho gaye the jahan ka qissa pehle tahreer kar diya gaya hai, jahan wah Misriyon ke char sau saal tak gulam bane rahe Misr par us zamana mein Qibtiyon ki hukumat thi, unka badshah Firaun kehlata tha, yah Bani Israil par tarah-tarah ke zulm karta tha, Allah Ta'ala ne raham farmaya aur Bani Israil ki hidayat aur aazadi ke liye Hazrat Musa Alaihissalam ko paida kiya.

Firaun ka Khwab aur Hazrat Musa ki Paidaish

Misr ke badshah Firaun ko najoomiyon ne bataya ki Bani Israil mein bahut jald ek ladka paida hone wala hai jo teri hukumat ko tabah karke apni qaum ko aazad kara lega, is khabar se wah pareshan ho gaya aur usne hukm diya ki is qaum mein jo bhi ladka paida ho use zibah kar diya jaye magar ladkiyan zinda rehne di jayein.

Jis saal Hazrat Musa Alaihissalam paida hue unki walida ko is baat ka har waqt khatra laga rehta tha ki koi badshah ko is baat ki khabar na de magar Allah ne unko tasalli di ki tum fikr na karo, jab bhed khul jane ka khatra ziyada ho gaya to unhone Allah ke hukm se unhe ek sandook mein band karke dariya mein daal diya, dariya ke dusri taraf Firaun ke ghar wale the, unhone sandook ko jo behte dekha to utha kar ghar le gaye, unhein khabar na thi ki aage chal kar yahi ladka unke ranj ka sabab hoga, Firaun ki biwi ne kaha, ise qatl na karo yah hum sabki aankhon ki thandak hai, hamare kaam aayega aur ise apna beta banayenge.

Ab uske doodh pilane ki fikr hui to wah kisi aurat ka doodh nahin peete the, unki behan jo us sandook ke piche lagi hui thi, yah sab kuch dekh rahi thi, unhone kaha ki main ek anna ka pata deti hoon, jo usko paal legi aur acchi tarah dekh bhal kar legi aur unhone Hazrat Musa Alaihissalam ki maa ka pata bataya, is tarah Musa Alaihissalam apni maa ke paas pahunch gaye, Allah Ta'ala Hazrat Musa Alaihissalam ko apni qaum ke dushman Firaun ke ghar mein parvarish paate rahe, yahan tak ki jawan ho gaye.

Ek Qibti ka Qatl aur Hijrat

Ek roz ka qissa hai ki wah subah savere shehar aaye us waqt sabke sab aaram se so rahe the, unhone apni qaum ke ek aadmi ko dekha jise Qibti maar raha tha, kyunki wah isse begaar mein kaam lena chahta tha aur wah inkaar kar raha tha, Hazrat Musa Alaihissalam se apni qaum ki zillat bardasht na ho saki aur uski madad ke liye majboor ho gaye, unhone uske ghoosa maara ki uski jaan nikal gayi, uska marna tha ki hukumat mein khalbali mach gayi, Bani Israil ke ek shakhs ne hamari qaum ke aadmi ko maar dala, chunanche hukm diya gaya ki qatl karne wale ko maar diya jaye magar Hazrat Musa Alaihissalam ko waqt par khabar mil gayi aur wah Madyan ki taraf chale gaye jo Hazrat Shu'aib Alaihissalam ka shehar tha.

Hazrat Musa Alaihissalam ka Nikah

Madyan ke qareeb pahunche to dekha kuwein ke paas bahut se log jama hain jo apne-apne janwaron ko paani pila rahe hain magar do ladkiyan apne janwaron ke liye ek taraf khadi hain, Hazrat Musa ne un se poocha ki tum yahan kyon khadi ho, unhone kaha hamara baap boodha hai hum is intezar mein khade hain ki yah log apne janwaron ko paani pila lein to bacha hua paani apne janwaron ko dein, yah suna to unhone paani kheencha aur unke janwaron ko paani pila diya, aur ek darakht ke neeche jakar baith gaye kyunki shahar mein kisi se jaan pehchan na thi.

Wah dono ladkiyan Hazrat Shu'aib Alaihissalam ki sahibzadiyan thi jinka qissa aap pichle sun chuke hain unhone ghar jakar apne walid se tamam qissa bayan kiya aur unke farmane par apne ghar le gayin, jab unhone apni musibat ka qissa sunaya to Hazrat Shu'aib Alaihissalam ne farmaya ab darne ki zaroorat nahin Allah ne aapko zalim qaum se bacha liya hai.

Hazrat Shu'aib Alaihissalam ne unse kaha ki tum aath saal tak mere paas kaam karo aur do saal thahar jao to tumhein akhtiyar hai magar main iska haq nahin rakhunga, aath saal guzar jane par tumhein apne paas rehne par majboor na karunga, main apni taraf se yah wada karta hoon ki apni ek ladki ka nikah tum se kar doonga.

Hazrat Musa Alaihissalam ne kaha ki mujhe manzoor hai, aath das saal ismein jo muddat chahun puri karun, mujh par zor ziyadati na honi chahiye aur Allah Ta'ala in baton par gawah hai, chunanche wah barabar kaam karte rahe aur jab muddat puri ho gayi, to Hazrat Shu'aib ne apni ladki ka nikah unse kar diya.

Nubuwwat aur Mojzaat (Miracles)

Jab nikah ho gaya to donon miyan-biwi wahan se rawana hue aur raste mein ek jagah pahadi ki taraf unhone aag dekhi, Hazrat Musa Alaihissalam ne apni biwi se kaha ki tum yahan thahro main aag lekar abhi aata hoon, aur agar koi shakhs wahan mil gaya to usse rasta bhi maloom kar loonga, wahan gaye to maidan ke kinare par darakht mein se aawaz aayi mubarak hai wah jo is aag mein hai aur jo iske charon taraf hai, tum Tuwa ke maidan mein ho, apne joote utaar do, main badi danai wala Allah hoon tamam jahan ka, aur tumhara paalne wala, maine tumhein paigambari ke liye chun liya hai, jo kuch kehta hoon usko suno, meri ibadat karo, aur meri yaad ki khatir namaz ki pabandi karo beshak qiyamat aane wali hai, Musa (Alaihissalam) tumhare dayen haath mein kya hai? Unhone kaha yah meri laathi hai, is par sahara leta hoon, apni bakriyon ke liye isse patte jhadta hoon aur iske siva isse aur bhi kaam leta hoon, Allah Ta'ala ne hukm diya ki is laathi ko zameen par daal do laathi jo daali to wah saamp ki tarah daudti hui dikhai di, is par wah dar gaye, Allah Ta'ala ne irshad farmaya ki isko pakad lo aur daro nahin hum abhi isko pehli halat par kar dete hain, aur apna dahina haath apni bayin bagal mein de lo fir nikalo, bila kisi aib ke nihayat roshan hokar niklega, yah dusri nishani hogi taki hum tum ko apni qudrat ki badi nishaniyon mein se baaz nishaniyan dikha dein.

Firaun ke paas bhejna

In donon nishaniyon ke saath-saath Allah ne Hazrat Musa Alaihissalam ko Firaun ke paas bheja aur farmaya is mulk mein Firaun ne fasaad faila rakha hai aur sarkashi par kamar baandh rakhi hai, aapne farmaya ki mujhe dar hai ki wah mujhe jhutlayega, maine uske ek aadmi ko maar diya tha, ab wah mujhe maarne ki koshish karega, mera ji rukta hai, meri zaban khol ki log meri zaban samajh lein aur mere bhai Haroon ko bhi mere saath kar de ki mujhe quwwat mile.

Hazrat Musa Alaihissalam ki dua qubool ho gayi aur donon bhaiyon ne Misr mein jakar Firaun se kaha ki Allah Ta'ala ne humein tere paas bheja hai ki tu Bani Israil ko na sata, aur unhein hamare saath rawana kar de, hamare paas tere Rab ki nishaniyan hain, aur yah bhi yaqeen kar le ki salamati us shakhs ke liye hai jo seedhi raah par hai aur jo shakhs jhutlayega aur sarkashi karega us par Allah ka azaab aayega.

Firaun ke paas Allah ka paigham pahuncha diya gaya magar use apni hukumat fauj aur khazanon par ghamand tha isliye wah barabar unse bahas karta raha, aur jab har baat ka usko theek-theek jawab milta raha to usne Musa se kaha tum bacche the jab tum hamare ghar mein aaye, humne tumhein saalha saal tak acchi tarah pala, aur raha ehsan jatlana parvarish ka so wah yah nemat hai jiska tu mujh par ehsan rakhta hai ki tune Bani Israil ko sakht zillat mein daal rakha tha, aur jab tum ne mere qatl ka irada kiya to main Madyan chala gaya fir Allah ne mujhe danai di aur ab Rasool bana kar teri taraf bheja.

Firaun ne kaha tum ne wah harkat yani Qibti ko qatl kiya tha aur tum bade na-sipaas ho. Hazrat Musa ne jawab diya ki waqai main us waqt wah harkat kar baitha tha aur mujh se galti ho gayi thi.

Firaun is baat ko sun kar la-jawab ho gaya, aur baat badal kar poochne laga, tumhara Rab kaun hai, aapne farmaya jisne aasman aur zameen ko paida kiya jo na sirf tumhara balki tumhare baap dada ka paalne wala hai.

Firaun ne darbariyon se kaha ki yah to koi deewana hai jo behki-behki baatein kar raha hai.

Hazrat Musa Alaihissalam ka Jadugaron se Muqabla

Aakhir jab wah har tarah se tang ho gaya to usne tamam mulk mein dhindhora pitwaya, bade-bade jadugaron ko bulwaya, charon taraf harkare dauda diye aur Eid ke din sabke sab maidan mein jama hue ab ek taraf Firaun tha, uske darbari shahi faujein aur uski qaum, aur dusri taraf gareeb aur bekas Hazrat Musa Alaihissalam aur Haroon Alaihissalam the, Allah ke siva aur madad dene wala na tha.

Jadugaron ne nazarbandi karke apni rassiyan aur lathiyan daal di aur dekhne walon ko aisa maloom hua ki wah sab dhod rahi hain Hazrat Musa Alaihissalam pehle to dar gaye magar Allah Ta'ala ne kaha tu na dar teri hi fatah hogi, tere dahine haath mein jo lathi hai use daal de ki wah in sab ko nigal jayegi jo kuch unhone banaya hai yah sirf jadoo hai jahan Allah ka hukm aa jaye wahan jadoo kaam nahin kar sakta, ab jo unhone apni lathi daali to wah azdaha ban kar sab ko nigal gayi, jadugaron ne jo dekha to wah sabke saamne sajde mein gir pade, aur kaha ki hum Musa aur Haroon Alaihissalam ke Rab par Imaan le aaye, Firaun ne gussa mein aakar kaha tumne isko maan liya hai abhi maine hukm nahin diya tha, wahi tumhara bada hai jisne tum ko jadoo sikhaya hai tum sabne milkar yah shararat ki hai tum sabke haath aur paanv kaat dalunga aur fir sabko sooli par chadha dunga.

Magar in jadugaron par dhamki ka kuch asar na hua unhone kaha humein kuch parwah nahin humein apne Rab ke paas jana hai zor to bas isi zindagi tak chal sakta hai jo kuch tujhe karna hai kar le, ae hamare paalne wale hum tujh par Imaan le aaye hain, jab hum par yah musibatein aayi to humein sabr dena aur duniya se Musalman hi uthana.

Firaun ne in jadugaron ko jo Musalman ho gaye the sooli par chadha diya aur unke haath pair katwa diye, itni takleefon ke hote hue bhi wah Imaan par qaim rahe, is waqia ke baad bhi Firaun ki qaum Allah Ta'ala par Imaan nahin layi aur apne guroor par rahi, Allah Ta'ala bada meharban hai, wah baar-baar apne bandon ko seedhi raah dikhata hai iske baad Allah Paak Firaun aur uski qaum ko darane ke liye tarah-tarah ke azaab bhejta raha, kabhi logon ki nasihat ke liye qahat daal diya aur paidawar ki kami kar di, magar jab kabhi un par koi aafat aati to yahi kehte ki Musa aur unke sathiyon ki nahusat hai, fir aur ziyada samjhane ke liye un par waba, tiddiyan, juein, mendak aur khoon ki nishaniyan bheji, magar jab kabhi un par koi azaab aata to Hazrat Musa Alaihissalam se kehte ki aap hamare liye dua karein, agar azaab tal gaya to hum zaroor Musalman ho jayenge, magar unki halat yah thi ki idhar azaab tala aur udhar wah apne iqrar se fir gaye.

Jab unki had ho gayi to Allah ke hukm se Hazrat Musa Alaihissalam apni tamam qaum ko lekar wahan se raato raat nikal khade hue, Firaun ne bhi shararat aur zulm se unka picha kiya aur subah hote hi unko samandar ke qareeb ja liya, Musa Alaihissalam ke sathi chillaye ki hum pakde gaye aapne farmaya hargiz nahin, mere saath mera Rab hai, wah mujhe rasta bata dega.

Garaz Allah Ta'ala ne Bani Israil ko sahih w salim samundar ke paar utaar diya magar jab Firaun aur uske lashkaron ne zulm aur shararat ke liye unka picha kiya to dekhte hi dekhte sab garq ho gaye aur yun Allah ne unko baagon chashmon aur aalishan mahalon se nikala aur fir un zalimon par na aasman roya aur na zameen, aur Bani Israil ko un cheezon ka malik bana diya isliye ki wah sabr karte the.

Mann w Salwa ki Nematein

Samundar se paar hokar yah log Misr ke registano mein safar kar rahe the, Allah Ta'ala ne unhein dhoop ki takleef se bachane ke liye un par abr ka saya kar diya aur unke khane ke waste mann w salwa bhej diye, unko barah qabeelon mein taqseem kar diya aur har ek ke liye paani ka ek chashma muqarrar kar diya, magar ziyada der tak wah in cheezon par sabr na kar sake aur gehun aur saag, kakdiyan, lahsan, masoor aur pyaz ki khwahish ki, Hazrat Musa Alaihissalam ne majbooran unhein shahar jane ki ijazat de di.

Hazrat Musa Alaihissalam Toor par gaye ki Allah Ta'ala se Taurat hasil karein unki gair haziri mein unki qaum ne sone chandi ka ek bachda bana liya aur use poojna shuru kar diya, Hazrat Haroon Alaihissalam ne unhein bahut samjhaya magar wah na maane aakhir tang aakar wah chup ho gaye ki kahin inmein ziyada ikhtilaf na ho jaye Toor se wapas aakar aap Alaihissalam ne un logon ko bataya ki tumne bahut bura kiya sab ne apne gunahon ka iqrar kiya, aur aainda ke liye tauba ki.

Ek martaba Bani Israil ne Hazrat Musa se kaha ki hum aapki koi baat na maanenge, jab tak hum apni aankhon se Allah Ta'ala ko na dekh lein, is kaam ke liye unhone apni qaum mein se sattar aadmi chun liye aur muqarrara jagah par pahunch gaye, yahan bijli ki kadak ne unko aa liya, aur wah behosh hokar gir pade, iske baad Allah ne unko zinda kar diya ki fir aisi baat zaban se na nikalein.

Qaum ki Buzdili aur Nafarmani

Aapne qaum se farmaya ki Allah ne tum mein Nabi paida kiye aur tumhein aazad kiya, ab tum himmat karke mulk Shaam par hamla karo, Allah tumhein zaroor kamiyab karega, aur agar buzdili se kaam liya to zaroor nuqsan uthaoge magar un logon ne saaf inkaar kar diya aur kaha wahan ke rehne wale bade bahadur aur jawan mard hain, aur agar wah apne aap is mulk ko khali kar dein to hum zaroor is mulk par qabza kar lenge, warna aap janein aur aapka Khuda hum to yahan se ek inch aage nahin badhenge.

Aap unka jawab sun kar bahut naraaz hue aur dua ki ae mere Parvardigar mujhe aur mere bhai ko in nafarmano se alag kar de, Allah Ta'ala ki taraf se irshad hua ki tum in badbakhto pe ranj na karo hum ne chalis saal tak inka dakhila mulk Shaam mein band kar diya hai, yah jangal hi mein bhatakte firenge.

Hazrat Musa Alaihissalam ki Hazrat Khizr Alaihissalam se Mulaqat

Ek dafa aap apne khadim ke saath safar kar rahe the ki chalte-chalte aisi jagah pahunch gaye jahan do samundar milte the, wahan unka khadim machli bhool gaya aur donon aage badh chale gaye kuch door jakar unhone apne khadim se kaha main thak gaya hoon khana lao, usne kaha jab chattaan par hum safar kar rahe the to us machli ne dariya ka rasta liya tha, asal mein Hazrat Musa Alaihissalam ko usi jagah ki talash thi, isliye fir usi jagah par wapas chale aaye, wahan unhone Allah ke ek nek bande ko dekha, aur kaha ki Allah ne jo kuch aapko ilm diya hai wah mujhe bhi sikha dijiye, magar unhone jawab diya ki tum sabr na kar sakoge.

Aakhir jab unhone ziyada israr kiya to kaha ki tum mere saath rehna chahte ho to shart yah hai ki jab tak main khud tum se na kahun mujh se koi baat na karna aur na hi poochna, Hazrat Musa Alaihissalam ne yah shart manzoor kar li, aur donon safar par rawana ho gaye.

Donon ek kishti par sawar ho gaye to us Allah ke bande ne kishti ko tod dala, Hazrat Musa Alaihissalam is par naraaz hue aur kaha tumne khwah-makhwah kishti tod di, ismein sawar log doob jayenge, unhone shart yaad dilai to aapne kaha main bhool gaya, ab aisa nahin hoga, aage badhe to khushki par ek ladka mila jise unhone qatl kar dala, is par Musa bigad gaye aur kaha bagair kisi kasoor ke usko maar dala, aapne bahut bura kiya, is par unhone kaha ki maine kaha tha ki aap mere saath na chal sakenge, fir donon mein qaul-o-qarar hua.

Chalte-chalte ek gaon mein pahunche jahan ke logon ne unko apna mehman banane se inkar kar diya, magar in donon ne dekha ki ek deewar girne wali hai usko unhone durust kar diya, Hazrat Musa Alaihissalam fir sabr na kar sake aur kaha ki agar aap chahte to unse is kaam par majduri maang lete, Allah ke bande unse kaha ki ab hum donon ek saath nahin rah sakte magar juda hone se pehle in qisson ka matlab sun lijiye, kishti chand gareeb aadmiyon ki thi jo use kiraya par chalate the, dariya ke us taraf ka badshah zabardasti kishtiyan cheen liya karta tha, maine usko tod diya ki aibdar hone ki wajah se use koi na lega.

Raha ladka to uske maa-baap imandar the magar yah sarkash aur kafir tha, dar tha ki iski nafarmani aur kufr se maa-baap ko takleef pahunche, maine qatl kar diya ki Allah inhein meharban aur nek beta ata kare.

Deewar shahar ke do yateem bachcho ki thi, jiske neeche unki daulat dafan thi, unka baap nek tha, agar deewar gir jati to dusre log unki daulat par qabza kar lete, Allah Ta'ala ki marzi yah thi ki donon jawan hokar apna khazana nikal sakein.

Yah jo kuch hua tumhare Rab ki rahmat ka nateeja hai, maine apni taraf se kuch nahin kiya, yahi wah baatein thi jin par sabr na kar sake, Hazrat Musa Alaihissalam uske baad ek arsa tak Banu Israil ko hidayat karte rahe, buraiyon se rokte rahe, acchaiyon ki takeed karte rahe aur aakhirkar apne Allah Paak se ja mile, jisne unko bheja tha.