Hazrat Ibrahim Alaihissalam ke zamane hi mein ek dusri basti mein Allah Pak ne Hazrat Lut Alaihissalam ko apna paighambar bana kar bheja. Hazrat Lut Alaihissalam ki qaum ke log badi be-sharmi ke kaam kiya karte thay—chori, daka, zina waghairah.

Hazrat Lut Alaihissalam ne baar-baar samjhaya ki tum aisi be-sharmi ke kaam kyu karte ho, jo tum se pehle duniya mein kisi ne nahi kiye? Tum auraton ko chhod kar ladkon se be-sharmi ki baat karte ho. Unki qaum walon ko aur koi jawab nahi aaya to kehne lage ki Lut aur uske ghar walon ko apne gaon se nikal do, yeh bahut paak bante hain.

Hazrat Lut Alaihissalam ne phir samjhaya ki dekho jo kuch main kehta hoon, tumhari hi bhalai ke liye kehta hoon. Main tum se yeh nahi kehta ki jo kuch main tumko nasihat karta hoon iske badle mein mujh ko koi paisa ya mazdoori do, balki iska badla to mujh ko Allah Ta'ala denge.

Hazrat Lut Alaihissalam ki nasihat ka un par koi asar na hua aur kehne lage ki jis azab se tu hum ko darata hai, agar tu saccha hai to ek din is azab ko hum par le aa.

Farishton ki Aamad aur Qaum ki Nafarmani

Bachon! Phir kya hua, aakhir Khuda ka gajab josh mein aa gaya. Allah ne farishton ko khubsurat ladkon ki shakal mein Hazrat Lut Alaihissalam ke makan par bheja. Hazrat Lut Alaihissalam ne jab ladkon ko dekha to bahut gamgeen (pareshan) huye ki yeh ladke mere paas mehman aaye hain aur meri qaum ke log inko pareshan karenge. Kehne lage, aaj ka din meri mushkil ka din hai.

Hazrat Lut Alaihissalam ki qaum ke logon ne khubsurat ladkon ko unke ghar par dekha to daudte huye aaye kyunki yeh log pehle hi se bure kaam karte thay. Hazrat Lut Alaihissalam ne unse kaha ki aye meri qaum Khuda se daro, aur mere mehmanon ke baare mein meri izzat kharab na karo. Tum meri ladkiyon se shadi kar lo, kya tum mein koi bhi bhala maanas nahi hai?

Woh bole ki tum ko maloom hai ki tumhari betiyon ki hum ko zarurat nahi hai, jo kuch hum chahte hain woh tum ko maloom hai. Hazrat Lut Alaihissalam ne kaha kaash mujh mein tumhare muqable ki taqat hoti, ya main kisi mazboot qile mein hota.

Azaab ki Raat

Farishte jo khubsurat ladkon ki shakal mein aaye thay unhone Hazrat Lut Alaihissalam ko itna gamgeen dekha to kaha:

Hazrat Lut Alaihissalam Khuda ke hukm ke mutabik apni biwi ko chhod kar baki apne ghar walon ko lekar raat ko is basti se chal nikle.

Basti ka Palat Jana

Subah ke qareeb Allah Ta'ala ka azab aaya aur us basti par patthar aur kankaron ki baarish shuru hui. Phir us basti ko utha kar ulta patakh diya aur use neeche upar kar diya. Aur woh basti jiske log ladkon se be-sharmi ki baatein karte thay aur Hazrat Lut ke mana karne se nahi maante thay, sab fana ho gaye.