Bachchon! Aap Hazrat Ibrahim Alaihissalam ka qissa sun chuke hain.

Hazrat Yusuf Alaihissalam Hazrat Yaqub Alaihissalam ke chhote bete the aur Yaqub Alaihissalam Hazrat Ibrahim Alaihissalam ke pote the, is tarah Hazrat Yusuf Alaihissalam Hazrat Ibrahim Alaihissalam ke pad-pote hue.

Hazrat Yaqub Alaihissalam ke barah (12) bete the aur Hazrat Yusuf Alaihissalam sabse chhote the, bahut khubsurat the, Hazrat Yaqub Alaihissalam unko bahut chahte the, Hazrat Yusuf Alaihissalam ne ek khwab mein dekha ki gyarah (11) sitare aur chand aur suraj mujhe sajda kar rahe hain, unhone yah khwab apne baap ko bataya, to hazrat yaqub Alaihissalam ne Hazrat Yusuf Alaihissalam ko mana kar diya ki yah khwab apne sotele bhaiyo ko na batana.

Bhaiyon ki Saazish aur Kuwan

Hazrat Yusuf Alaihissalam ke sotele bhaiyo ne mil kar mashwara kiya ki hamare abba jaan Yusuf Alaihissalam ko bahut chahte hain aur hum ko itna nahi chahte, isliye Yusuf Alaihissalam ko jaan se maar diya jaye, lekin unmein se ek ne kaha ki jaan se mat maaro balki Yusuf ko aise kuwein mein phenk do jismein paani na ho, sab ne mil kar yah baat tay kar li.

Sab bhai apne baap ke paas aaye aur kaha ki aap Yusuf Alaihissalam ko hamare saath khelne ke liye bhej dein, unke baap Hazrat Yaqub Alaihissalam ne kaha ki mujhe dar hai ki kahin tum khel khud mein lag jao aur koi bhediya Hazrat Yusuf Ko kha jaye, bhaiyon ne kaha ki hum ek taqatwar jamaat hain aisa kaise ho sakta hai.

Aakhir Hazrat Yaqub Alaihissalam ne Hazrat Yusuf Alaihissalam ko bhaiyo ke saath bhej diya, bhaiyo ne unko saath le ja kar ek andhere kuwe mein phenk diya, aur raat ko rote hue ghar wapas aaye aur kaha ki abba jaan hum aapas mein dhod me laga huwe the, aur Yusuf hamare saaman ke paas baitha tha ki achanak ek bhediya aaya aur usko kha gaya, saboot ke liye ek kurta khoon laga kar baap ko dikhaya, boode baap kya karte, sabr kiya khamosh ho gaye, lekin bete ki judai mein rote rehte.

Bachcho jis kuwe mein Hazrat Yusuf (A.S) ko phenka tha, uske qareeb hi ek qafila aaya aur unhone paani nikalne ke liye dol kuwe mein dala, dekha ki ek khubsurat ladka kuwe mein hai, unko bahar nikal liya aur jab qafila Misr pahuncha to wahan per Misr ke badshah ne un qafile walon ko thodi qeemat dekar Hazrat Yusuf (A.S) ko khareed liya aur apni biwi Zulekha se kaha ki isko pa lo ho sakta hai ki hum isko apna beta bana lein.

Zulekha aur Qameez ka Waqia

Hazrat Yusuf Alaihissalam jawan ho gaye, unki khubsurati w wajahat w aqlmandi aur badh gayi, Zulekha Aziz-e-Misr ki biwi un par farefta ho gayi aur unko unke nafs ki janib se phuslane lagi, ek roz usne kamre ke saare darwaze band kar diye, Hazrat Yusuf Alaihissalam ne yah halat dekhi to Khuda se panah maangi aur darwaze ki taraf bhage, Zulekha ne piche se aapki qameez pakad li jisse qameez phat gayi.

Us waqt Aziz-e-Misr yani Zulekha ka shauhar bhi darwaze par aa gaya Zulekha ne ulta ilzaam Hazrat Yusuf Alaihissalam par lagaya, aur apne khawind se kaha ki yah shakhs teri biwi ko be-aabru karna chahta tha jiski saza isko milni chahiye, Hazrat Yusuf Alaihissalam ne kaha main be-gunah hoon balki ye aurat mujh ko phuslane ki koshish kar rahi thi magar Khuda ne mujhko isse bacha liya, aakhir yah muamla Qazi ke paas pesh hua, Qazi ne Hazrat Yusuf Alaihissalam se safai ke liye gawah talab kiye, Hazrat Yusuf Alaihissalam ne Aziz-e-Misr ke khandan ke ek masoom aur nanhe bachche ki taraf ishara kiya ki yah us waqt maujood tha yah sacchi gawahi dega, nanhe bachche ne kaha ki agar qameez aage se phati hai to Yusuf mujrim hain, aur agar qameez piche se phati hai to Yusuf Alaihissalam sacche hain aur Zulekha jhooti hai jab Hazrat Yusuf ka kurta dekha gaya to wah piche se phata tha, Aziz-e-Misr ne Hazrat Yusuf se kaha ki is baat ko jane do, aur Zulekha se kaha ki tu maafi maang, haqeeqat mein tu hi kasoorwar hai.

Aurton ki Dawat

Is waqia ki khabar sare Misr mein fail gayi aur aurte aapas mein baatein karne lagin ki Zulekha apne gulam ko chahti hai, jab Zulekha ko iska ilm hua to use apni badnami ka khayal aaya, usne tarkeeb sochi wah yah ki usne Misr ki aurto ko dawat ki aur sabke haathon mein ek-ek churi aur ek-ek phal de diya aur usi waqt Hazrat Yusuf Alaihissalam ko waha le aayi aurto ne jab Hazrat Yusuf ke husn we jamal aur khubsurati ko dekha to wah sab apne hosh mein na rahi aur churiyon se bajaye phal ke apne haatho ko kaat liya aur kehne lagi waqai yah koi insan nahi farishta hai, Zulekha ne un aurton se kaha ki ye wahi shakhs hai ki jiske liye tum mujhe malamat karti ho, main haqeeqat mein isko chahti hoon agar usne meri mohabbat ko thukra diya to main isko qaid kara doongi.

Hazrat Yusuf Alaihissalam Jel Mein

Hazrat Yusuf ko jab iska ilm hua to unhone Allah Ta’ala se dua ki ki ae Allah tu hi mujh ko bacha sakta hai, agar main in aurton ke fareb mein aa gaya to main jahilon mein se ho jaunga, isse yah behtar hai ki mujhe qaid khana mein daal diya jaye, Allah ne Hazrat Yusuf ki dua qubool ki aur wah jel mein daal diye gaye.

Hazrat Yusuf se pehle jel mein do qaidi aur bhi the, ek shahi bawarchi aur dusra badshah ko sharab pilane wala saaki, unke khilaf ilzaam tha ki unhone badshah ko zehar dene ki koshish ki hai Hazrat Yusuf Alaihissalam jel mein qaidiyon ko Allah Ta’ala ki baatein batate rahe aur Khuda ka paigham pahunchate rahe, ek din yah dono qaidi Hazrat Yusuf Alaihissalam ke paas aaye aur unhone kaha ki humne ek ajeeb khwab dekha hai, Saaki ne kaha ki maine dekha hai ki badshah ko angoor sharab pila raha hoon, Bawarchi ne kaha ki maine dekha hai ki mere sar par rotiyan hain aur parinde unko noch-noch kar kha rahe hain, yah khwab bayan karne ke baad unhone Hazrat Yusuf Alaihissalam se iski tabeer pucchi, Hazrat Yusuf Alaihissalam ne bataya ki Saaki to jel se chhoot jayega, aur fir badshah ki mulazmat mein jakar usko sharab pilayega, aur Bawarchi ko sooli par chadha diya jayega, aur iski laash ko janwar khayenge.

Aisa hi hua, Allah Ta’ala ne Saaki ko riha kara diya aur Bawarchi ko sooli ho gayi.

Hazrat Yusuf Alaihissalam iske baad bhi saalon jel mein rahe lekin kisi ko inki rihayi ka khayal na aaya, ittefaqan ek Misr ke badshah ne khwab mein dekha ki saat dubli patli gayein saat moti taazi gayon ko kha rahi hain, aur saat hari aur saat sookhi hui baalein dekhin badshah ne apne darbariyon se iski tabeer pucchi magar koi bhi sahih jawab na de saka, is mauka par Saaki ko yaad aaya ki usne apna khwab Hazrat Yusuf Alaihissalam se pucha tha aur aapka jawab bilkul sahih hua tha, usne kaha ki jel mein ek shakhs hai jo khwab ki sahih tabeer bayan karta hai. Badshah se jisko Aziz-e-Misr kehte the ijazat lekar wah jel gaya aur Hazrat Yusuf Alaihissalam se sara waqia bayan kiya.

Hazrat Yusuf Alaihissalam ne farmaya ki is khwab ki tabeer to yah hai ki saat saal mulk mein khoob galla paida hoga, aur saat saal sakht qahat padega, aur fir ek saal aayega, jismein khoob baarish hogi aur galla hoga, jab us shakhs ne badshah ko jakar yah khabar sunai to usne kaha ki Hazrat Yusuf ko bulaya jaye, jab wah dobara Hazrat Yusuf Alaihissalam ke paas gaya aur badshah ka paigham sunaya, to aapne farmaya un aurton ka kya haal hai jinhone apne haath kaat liye the, beshak mera Rab unke makr w fareb se waqif hai, badshah ne un aurton ko bula kar pucha to unhone kaha ki humne Hazrat Yusuf mein koi burai nahin dekhi yah dekh kar Zulekha bhi boli ki ab jab ki haq zahir ho gaya hai, sach baat yah hai ki maine hi Hazrat Yusuf Alaihissalam ko warglaya tha aur wah bilkul saccha hai.

Hazrat Yusuf Badshah Ban Gaye

Hazrat Yusuf Alaihissalam jab jail se riha ho gaye to badshah ne hukm diya ki Yusuf ko izzat ke saath bulaya jaye, main shahi khidmat unke supurd karunga, Hazrat Yusuf (A.S) aaye aur badshah se baat-cheet ki, Hazrat Yusuf ne kaha ki mujhko shahi khazane ka wazir muqarrar kijiye main iski behtar hifazat karunga, badshah ne manzoor kiya aur unhein shahi khazane ka wazir muqarrar kar diya.

Aakhirkar wah qahat ka zamana aa gaya jiska badshah ne khwab dekha tha aur iska asar us jagah bhi pahuncha jahan Hazrat Yusuf Alaihissalam ke walid aur bhai bhi rehte the, chunanche....

Hazrat Yaqub Alaihissalam ne apne beto ko galla lane ke liye Misr mein Hazrat Yusuf Alaihissalam ke paas bheja, jab Hazrat Yusuf ke bhai aaye to Hazrat Yusuf Alaihissalam ne unko pehchan liya aur bhai Hazrat Yusuf Alaihissalam ko nahi pehchan sake, Hazrat Yusuf (A.S) ne unko galla diya aur kaha ki agli dafa aao to apne dusre bhai ko bhi saath le kar aana, warna main tumko galla nahi dunga, aur apne mulazimon se keh diya ki jo qeemat unhone galla ki di hai wah bhi chupke se unke saman mein rakh do, taki wah fir Misr aayein.

Jab yah log apne shehar Kanaan pahunche to apne baap Hazrat Yaqub Alaihissalam se kaha ki abba jaan, ab ke hamare saath bhai ko bhejiye warna hum ko galla nahi milega, aur hum iski khoob hifazat karenge.

Jab unhone apna asbaab khola aur usmein saari raqam dekh kar bahut khush hue, fir baap se kaha ki dekhiye Shahe Misr ne hamari raqam bhi wapas kar di hai, aap hamare saath bhai ko zaroor bhej dein, hum khoob hifazat karenge aur humko saman bhi zyada milega.

Hazrat Yaqub Alaihissalam ne kaha ki jab tak tum Allah ka ahad mujh ko na do ki iski hifazat karoge aur isko sabke saath rakhoge us waqt tak main isko tumhare saath nahi bejunga, aakhirkar sab bhaiyon ne ahad kiya.

Hazrat Yaqub Alaihissalam ne inko nasihat ki ki tum sab ek darwaza se dakhil mat hona, aakhir jab yah sab ilahida-ilahida darwazon se dakhil hue to Hazrat Yusuf Alaihissalam ne apne sage bhai binyameen ko bataya ki main tumhara saga bhai hoon, aur main tum ko apne paas rakhunga, aakhir jab un sab ka saman taiyar ho gaya to Hazrat Yusuf Alaihissalam ne apna ek bartan apne sage bhai ke saman mein chupke se rakhwa diya aur elan hua ki shahi katora gum ho gaya hai, jisne liya ho wah de de usko ek oont galla inaam diya jayega, sab bhaiyo ne inkar kiya, badshah ke aadmiyo ne kaha ki jiske saman se nikle isko rok rakhein iski yahi saza hai, hamare mulk ka bhi yahi qanoon hai, fir tamam bhaiyon ki talashi li gayi, aakhir binyameen ke saman mein se wah katora nikla, is tarah Hazrat Yusuf Alaihissalam ne apne bhai bin-yameen ko apne paas rok liya.

Bhaiyon ne dekha to kehne lage iska bhai bhi chor tha, Hazrat Yusuf Alaihissalam ne sab kuch suna aur khamosh rahe, ab sab bhaiyo ne milkar Hazrat Yusuf se darkhwast ki ki iska baap bahut boodha hai is par raham kha kar ise chhod dijiye aur iski jagah hum mein se kisi ko pakad lijiye, Hazrat Yusuf Alaihissalam ne farmaya: Allah ki panah jo chor ko chhod kar be-gunah ko pakdu, jab yah log bilkul mayus ho gaye to sabne milkar mashwara kiya ki ab kya karna chahiye to sabse bade ne kaha tum ne Allah ki qasam kha kar apne baap ko yaqeen dilaya tha ki isko zaroor wapas laoge fir Yusuf ke saath humne jo harkatein ki wah tum se chupi nahi isliye meri to himmat nahi ki baap ko muh dikhau, ya khud hazir hone ki ijazat dein ya Allah koi dusri surat paida kar dein to aur baat hai, tum log jao aur jo kuch hua hai theek-theek apne baap se bayan kar do, agar wah apni tasalli karna chahein to is gaon ke logon se pooch lein ki jahan hum thahre the aur is qafila se maloom kar lein jiske saath hum aaye hain.

Hazrat Yaqub ka Gham aur Sabr

Is mashwara ke baad yah log ghar pahunche aur walid sahib ko tamam qissa sunaya, unhone sunte hi farmaya tumhare dilon ne yah baat ghad li hai, baharhal sabr achha hai, ummeed hai ki Allah hum sabko ek jagah jama kar dega, wahi khoob jaanta hai ki yah kya ho raha hai, aur unse dusri taraf rukh kar liya, Hazrat Yusuf ke gum se unki aankhein safed ho gayi thi Yusuf ke bhaiyon ne kaha, abba jaan aap to Yusuf ko yaad karte hue ghul jayenge aur jaan de denge.

Unhone farmaya main apni shikayat to Allah se karta hoon aur main aisi baatein jaanta hoon jinki tumhein khabar nahi, jao Yusuf aur uske bhai ko talash karo wah Misr hi mein kahin na kahin mil jayenge, Allah ki rahmat se naummeed hone ki koi wajah nahi.

Ab ek baar fir sab bhai milkar Misr pahunche, Hazrat Yusuf Alaihissalam se ghar walon ki buri halat bayan ki aur kaha ki hum apne saath bahut thoda saman laye hain magar chahte hain ki aap pura-pura galla dein, Hazrat Yusuf ne apne ghar ka yah haal suna to betaab ho gaye unse raha na gaya, aur unhone apne bhaiyon se kaha tum jaante ho ki tum ne Yusuf aur uske bhai ke saath kya kiya hai, bhaiyon ne nihayat ta'ajjub aur hairani ke saath pucha ki kahin aap hi to Yusuf nahin?

Aapne farmaya haan main hi Yusuf hoon aur yah mera bhai hai, Allah ne hum par bada ehsan kiya beshak jo shakhs nek zindagi basar karta hai aur sabr se kaam leta hai, Allah iska badla deta hai, jab tamam bhaiyon ko yaqeen ho gaya ki jiske darbar mein hum is waqt khade hain, hamare bhai Yusuf hain, to sabne milkar apne gunahon ka iqrar kiya, aapne farmaya tum koi fikr na karo, tum par koi ilzaam nahin, Allah tamam gunahon ko mu'aaf kare wahi sabse ziyada raham karne wala hai, jao mera kurta mere baap ke chehre par daal do unki beenai laut aayegi, aur fir sabko yahan le aao.

Udhar qafila Misr se rawana hua aur idhar Hazrat Yaqub Alaihissalam ne apne ghar walon ko yah khushkhabari di ki mujhe Yusuf Alaihissalam ki khusbu aa rahi hai, unhone suna to kaha ki tumhare sar par ek hi khabt sawar hai, aakhir qafila aa gaya, Hazrat Yusuf Alaihissalam ka kurta unke saamne rakh kar tamam halat sunaye to unhone ghar walon se kaha, dekho maine tum se nahin kaha tha, aakhir sab beton ne milkar aap se gunahon ki mu'aafi maangi aur Misr ko chal diye.

Hazrat Yusuf Alaihissalam se mulaqat hui to unhone maa-baap ko apne paas thahraya aur kaha Khuda chahe to Misr mein amn aur aaram ke saath rahiye fir unko apne saath takht par bithaya, sabke sab bhai shahi aadab baja laye, aapne farmaya yah mere khwab ki tabeer hai, Allah ne usko sach kar dikhaya, usne mujh par bada ehsan kiya jo mujhe qaid se chhudaya, aur Shaitan ne jo fasaad mere aur mere bhaiyon ke darmiyan daal diya tha, aap sabko dehat w bayaban se yahan le aaya beshak mera Rab khair ki hikmat jaanta hai.

Ae mere Parvardigar tune mujhe hukumat di, baaton ka matlab samjha diya, ae zameen w aasman ke paida karne wale Khuda tu hi duniya aur aakhirat mein mera kaam banane wala hai, mujhe Musalman hi maarna aur nek bandon ke saath mila dena.

Garaz ek arsa tak Hazrat Yusuf Alaihissalam Allah ke bataye hue qanoon ke mutabiq Misr mein hukumat karte rahe, logon ko Allah ki taraf bulate rahe, buraiyon se rokte rahe, bhalaiyon ko failate rahe mulk Misr ko achhaiyon se bhar diya aur bil-aakhir Allah ke paas chale gaye yani aapki wafat ho gayi aur aap Misr mein dafan hain.