Aapka zikr bhi Quran Sharif mein baar-baar aaya hai, taki log aapki sacchi baaton se sabaq seekhte rahein.

Madyan Basti Ki Halat

Bachchon! Purane zamane mein Madyan naami ek bada pur raunaq shahar tha, wahan ke log khoob maaldar the, tijarat aur saudagari unka pesha tha magar wah log buton ki pooja karte the, sauda bechte waqt kam taula karte the aur isi tarah kam napa karte the, Allah Ta'ala ne Hazrat Shu'aib Alaihissalam ko unke paas Nabi bana kar bheja.

Hazrat Shoaib (A.S) Ki Nasihat

Hazrat Shoaib Alaihissalam ne badi narmi, aajizi aur pyar se un logon se kehna shuru kiya:

Hazrat Shoaib (A.S) ne kaha: "Ae logo tum sirf ek Allah ki ibadat kiya karo, naap taul puri diya karo, logon ko unki cheezein kam taul kar na diya karo, zameen mein fasaad na failaya karo, aur tum sadkon par is garaz se mat baitho ki Allah Ta'ala par Imaan lane walon ko dhamkiyan do, aur Allah ki raah se roko, aur ismein kaji ki talash mein lage raho."

Tum kitne thode the, Allah ne tum par meharbani ki, tum ko aulad di, aur tum bahut ho gaye, dekho fasaad ka nateeja hamesha bura hota hai, agar tum mujhe jhoota khayal karte ho aur dusre logon ko mere sacche hone ka pura-pura yaqeen hai to sabr karo, yahan tak ki Allah hamare aur tumhare darmiyan faisla kar de!

Qaum ka Ghamand aur Inkaar

Qaum ke daulatmand raees log is baar-baar ki nasihat ko bardasht na kar sake aur unhone kaha:

Kafiron ka Jawab: "Yah kis tarah ho sakta hai ki hum unko chhod dein jinhein hamare baap-dada pooja karte the, maal hamara apna hai aur isko hum jis tarah chahte hain kharch na karein, aur wah bhi sirf aapke kehne par aur aap aise sacche nek kahan se ban gaye, kya aap ki namaz aisi hi baaton ka hukm deti hai, aap jhoote hain, aap par kisi ne jadoo kar diya hai agar sacche ho to aasman se hum par pathar barsao."

Aur unki qaum ke logon ne kaha ki ae Shu'aib is baat ka yaqeen kar lo ki hum tumhein bhi is basti se nikal denge, aur in logon ko bhi jo tum par Imaan laye hain, warna hamare deen mein wapas aa jao, tum bahut kamzor aadmi ho agar tumhari biradari ke log na hote to hum tumhein kabke patharon se maar-maar kar khatm kar chuke hote, aur waise tumhara hum par koi dabav bhi nahin.
Hazrat Shu'aib Alaihissalam ki qaum ke log apni daulat aur rupaye paise ke guroor mein baar-baar apne sacche Nabi Hazrat Shu'aib Alaihissalam se isi qism ki baatein karte rehte.

Hazrat Shoaib (A.S) ka Jawab

Hazrat Shu'aib Alaihissalam farmate hain Allah Ta'ala ne mujhe seedha rasta bataya hai aur apni meharbani se mujhe halal rozi bakhshata hai, ab yah kis tarah ho sakta hai ki jis kaam se main tumko rokta hoon use khud karne lag jaun main to sirf tum logon ko durust karna chahta hoon, aur sirf Allah par bharosa rakhta hoon, tum log meri zid mein aakar aisa gunah na kar baithna ki tum par azaab utar aaye jaisa ki tum se pehle logon par aa chuka hai balki tum apne gunahon ki mu'aafi maango aur aage ke liye usi ke huzoor mein tauba karo.

Tumne Allah ko bilkul bhula diya hai, kya tum meri biradari se ziyada darte ho, aur Allah ka khauf tumhare dilon se uth gaya hai, maine apna farz ada kar diya, agar tum nahin jante to chand roz ke baad tumhein maloom ho jayega ki jhootha kaun hai, aur kis par Allah ka azaab utarta hai.

Allah Ka Azaab

Aakhir Allah ka azaab aa gaya, Shu'aib Alaihissalam aur Imaan wale to bach gaye aur jo log Allah ki nafarmani karte the wah apne gharon mein baithe ke baithe reh gaye aur aise barbad hue ki goya in makanon mein kabhi base hi na the.

Sabaq (Lesson)

Bachchon! Bas Allah Ta'ala ke siva dusre ki ibadat karna, Allah Ta'ala ko bhool jana, aur gairon ko yaad karna, Rasoole Paak Sallallahu Alaihi Wa Sallam ki baatein na manna, dil ki khwahishat ko pura karna, kam taulna, kam napna, amn w aman ke baad zameen par fasaad machana, rupaya ka guroor, daulat ka ghamand karna, Allah ko behad napasand hai, jo log aisa karte hain aur tauba nahin karte sahih raah ikhtiyar nahin karte aakhirkar ek din zaroor saza payenge aur nuqsan uthayenge.

Aao hum sab milkar ahad karein ki Allah Ta'ala ke siva kisi ki ibadat na karenge aur kabhi na kam taulenge na kam napenge, guroor na karenge, aur kisi ka maal beimani se na khayenge, aur agar hum ne aisa kiya to hamara hashr bhi Hazrat Shu'aib Alaihissalam ki qaum jaisa ho jayega, Allah humko mehfooz rakhein Aameen.

Sawal Jawab (FAQ)

Sawal: Hazrat Shoaib (A.S) kis shahar mein bheje gaye the?

Jawab: Aapko "Madyan" shahar ke logon ki hidayat ke liye bheja gaya tha.

Sawal: Madyan ke logon mein kya khaas burai thi?

Jawab: Woh log naap-taul mein kami karte the (kam taulte the) aur raaston par baith kar logon ko darate the.

Sawal: Hazrat Shoaib (A.S) ki qaum par kaisa azaab aaya?

Jawab: Un par ek zabardast cheekh aur zalzale ka azaab aaya jisne unhein unke gharon mein hi khatam kar diya.