Bachcho! Hazrat Hud Alaihis Salam ka zikr Quran Sharif mein baar-baar aata hai, Surah Al-A'raf, Surah Hud aur Surah Al-Hajj wagairah mein iski tafseel maujood hai.

Hazrat Nuh Alaihis Salam ki aulad muddato tak duniya mein basi aur aahista-aahista fir Khuda Ta'ala ko bhool gayi, Shaitan ne fir unko behka kar buton ki pooja par laga diya.

Hazrat Hud (A.S) ki Dawat

Khudawand Ta'ala jo apne bando par bada raham karne wala hai, usne fir Hazrat Hud Alaihis Salam ko apna paighambar bana kar un logon ke paas bheja, aur unhone apni qaum se jo 'Aad' kehlati thi kaha ki:

"Main tum se is wa'az wa nasihat ke badle koi mazdoori ya ujrat nahin mangta, mujhe iska badla to wah dega jisne mujhe paida kiya hai."

Aur ae meri qaum tum apne Rab se bakhshish mango aur usse tauba karo, wah tumhare liye menh (barish) barsaega jisse tumhare khet aur baghaan achche honge aur tumhari taqat bahut badha dega.

Qaum ka Inkaar aur Zid

Wah bole ki ae Hud hum tumhare kehne se apne buton ko nahin chhod sakte, tum koi nishani dikhao, hum to yeh samajhte hain ki hamare buton mein se kisi ne tum par aaseb kar diya hai, aur tum deewane ho gaye ho.

Hazrat Hud Alaihis Salam ne kaha ki tum sab mil kar mere liye jo tadbeer karni chaho kar lo, aur mujhe mohlat bhi na do, main Khuda par bharosa rakhta hoon jo mera aur tumhara Parvardigar hai.

Mere haath Allah Ta'ala ne tumhe jo paigham bheja tha wah maine tumhe pahuncha diya, agar tum mera kehna na manoge to Allah Paak tumhari jagah aur logon ko basa dega aur tum Khudawand Ta'ala ka kuch nuksaan nahin kar sakte.

Is par unki qaum ne kaha ki roz tu hamein Khuda ke azaab se darata hai, ja apne Khuda se keh ki hum par azaab naazil kar de aur ismein hargiz der na kare.

Khaufnaak Azaab

Hazrat Hud Alaihis Salam par jo iman laye the wah gareeb aur kamzor the, aur jo kafir the wah maaldar aur sardar the. Un sab ne Hazrat Hud Alaihis Salam ka mazaq udaya.

Aasman par ek badal namoodar hua jise dekhkar yah samjhe ki barish hone wali hai, Hazrat Hud Alaihis Salam ko Allah Ta'ala ne bata diya tha ki yah azaab hai chunanche wah imandar logon ko le kar basti se bahar chale gaye.

Us badal ke baad aandhi aayi jo aath din aur saat raat tak mutawatr chalti rahi yahan tak ki sab kafir mar gaye aur nest wa nabood ho gaye, sirf Allah Ta'ala par iman lane wale hi baaki bach gaye, aur is tarah ek baar fir Allah Ta'ala ki zameen kafiron aur mushrikon se khaali ho gayi.