6 Cheeze Jinse Jannat Ki Zamanat

1. Jab Baat Karo To Sach Bolo..  

2. Jab Wada Karo To Pura Karo… 

3. Jab Tum Kisi Cheez Ke Ameen Ban Jao To Zamanat Ada Karo.. 

4. Apni Sharamgah Ki Hifazat Karo.. 

5. Apni Nigaaho Ko Neechi Rakho.. 

6. Apne Hatho Ko (Burai Se) Roke Rakho.

  Is Hadees Ke Ravi Hazrat Ubada Bin Samit Raziallahtala Anhu Hai. Unki Kunniyat Abul Walid Hai Or Yeh Ansaar Ke Kabile Banu Salim Ke Bahut Hi Naamwar Shaks Hai. Alaane Nabuwwat Ke Barwe Saal Haj Ke Moke Per Mina Ki Ghaati Me Madina Ke Jin Bharah Shakhso Ne Chup Kar Huzoor Sallallaho Alehe Wasallam Ke Mukaddas Hatho Per Bait Ki Thi Unme Se Ek Yeh Bhi Hai Fir Ailaan E Nabuwwat K Tahrwe 13 Saal Jab Isi Ghaati Me Madina Ke Bahattar Jaa Nisaro Ne Beyat Ki To Yeh Us Zamanat Me Bhi Shamil The. Jang-E-Badhar Or Tamam Islami Jihado Me Yeh Mujahidana Shaan Se Shareek Hue, Or Aala Darze Ke Hosh Mand Or Sahibe Ilm Bhi The  Amirul Momineen Hazrat Umar Raziallahtala Anhu Ne Apne Dore Khilafat Me Mulke Shaam Ka Kazi Or Muallim Bana Diya Tha Yeh Pahle Hamas Me Rahe Fir Filisteen Chale Gaye Tihattar Baras Ki Umar Pa Kar 34 Hijri Me Bamukaam Ramla Ya Beytul Mukaddas Me Wafaat Pai.

Sharhe Hadees :– Is Hadees Ka Khulasa Matlab Yeh Hai Ki Jo Musalman In 6 Cheezo Per Amal Karne Ka Ahad Karle Or Zaamin Ban Jaye To Huzoor Akram Sallallaho Alehe Wasallam Ne Us Musalman Ko Jannat Dilane Ki Zamanat Le Li Hai Or Yeh Guarantee Di Hai Ki Wo Zaroor Jannat Me Jayega. 

1. Sach Bolna :– Har Musalman Per Farz Hai Ki Wo Hamesha Sach Bole Or Hargiz Hargiz Jooth Na Bole. Jooth Bolna Gunah-E-Kabira Hai. Ek Hadees Me Huzoor Akram Sallallaho Alehe Wasallam Ne Irshad Farmaya Ke Tum Log Apne Liye Isko Lazim Samjo Ki Sach Hi Bolo Kiyu Ki Sachai Tumko Neki Ki Taraf Lekar Jayegi Or Nekukari Tumko Jannat Me Pahucha Degi Or Aadmi Hamesha Sach Bolta Rahta He Or Sachai Hi Ka Talabgaar Rahta Hai To Allah Ajjawajal Ke Darbaar Me Uske Liye Siddik Ka Laqab Likh Diya Jata Hai Or Tum Log Jooth Se Bachte Raho Kiyu Ki Jooth Tumhe Badkari Ki Taraf Le Jayega. Or Badkari Tumko Jahannam Me Pahucha Degi Or aadmi Lagatar Jooth Bolta Rehta Hai Or Jooth Ka Hi Talabgar Rehta Hai Yaha Tak Ki Wo Allah Tala Ki Baargah Me Kazzab Likh Diya Jata Hai. 

    (Tirmiji Jild 2 Safa 19) 

Allahuu Akbar! Ek Musalman Ki Khush Nasebi Ki Yeh Kitne Badi Mehraz Hai Ki Parwar Digare Aalam Ke Darbaar Se Usko Siddik Ka Muajjiz Khitab Mil Jaye Or Wo Dono Jahan Me Rabbul Aalmeen Ke Inaam Wa Ikraam Ki Dolato Se Malamaal Ho Jaye. Or Ek Musalman Ki Kitni Badi Nahusat Hai Ki Allah Azzawajal Ki Baargahe Kehro Jalaal Se Usko Kazzab Ka Ganda Or Ghinona Lakab Mile Or Wo Dono Jahan Me Khuda Ki Maar Wa Fatkaar Se Zaleel Wa Khuwar Ho Jaye.. 

“Kazzab” ( Bohot Bada Jootha ) Yeh Kitna Bura Or Kis Kadar Kabile Nafrat Khitab Hai Isko Samjhne Ke Liye Is Hadees Ko Padye Jiske Raavi Hazrat Safwaan Bin Saleem Tabei Ki Hai Ki – 

” Kisi Sahabi Ne Bargahe Risalat Sallallaho Tala Alehe Wasallam Me Arz Kiya Hai Ki Kiya Momin Buzdil Or Darpok Ho Sakta Hai ? To Huzoor Sallallaho Tala Alehe Wasallam Ne Farmaya Ki Haa.. Fir Kisi Ne Guzarish Ki Ke Kiya Momin Kanjoos Ho Sakta Hai ? To Apne Irshaad Farmaya Ki Haa.. Fir Kisi Ne Daryaaft Kiya Ki Kiya Momin Kazzab  ( Bohot Bada Jhuta ) Ho Sakta Hai? To Huzoor Ne Farmaya Nahi. 

(Mishqat Jild 2 Safa 414) 

Matlab Yeh Hai Ki Kazib Yani Kabhi Kabhi Ittifakiya Ya Bawaqte Zarurat Jooth Bolne Wala To Momin Khelayega Magar Kajjab Jo Hamesha Har Baat Me Jooth Hi Bole Wo Is layak Nahi Ki Usko Momin Kaha Jaye Kiyu Ki Kajjab Hona Hargiz Hargiz Kamil Imaan Musalman Ki Shaan Nahi Hai.. 

2. Wada Pura Kharna :– Musalman Kisi Se Koi Wada Kare To Us Wade Ko Pura Karna Musalman Ka Islami Fariza Hai Mukaddas Quran-E-Paak Me Khudawand Quddus Ka Farmaan Hai.. ” A Emaan Walo Apne Waado Ko Pura Karo “.. 

Islam Me Wada Pura Karne Ki Ahmiyat Ka Andaza Lagana Ho To Mukaddas Rasoolallah Sallallaho Tala Alehe Wasallam Ki Seerat-E-Mubaaraka Ka Yeh Shahkaar Yaad Karlo Or Nubuwwat Ke Is Ibrat Khej Or Nasihat Aamooz Aala Kirdaar Ko Kabhi Faramosh Na Karo Seerat-E-Nabwiya Sallallaho Alehe Wasallam Ki Kitabo Me Yeh Hadees Hai. – 

Hazrat Ibne Aamil Hasma Raziallahtala Anhu Ka Bayaan Hai Ki Elaan-E-Nabuwwat Ke Kabl Mene Huzoor Sallallaho Alehe Wasallam Se Koi Samaan Kharida To Huzoor Sallallaho Tala Alehe Wasallam Ki Kuch Rakam Mere Jimme Reh Gai Or Mene Huzoor Sallallaho Alehe Wasallam Se Wada Kiya Ki Mai Wo Rakam Abhi Lekar Aata Hu Lekin Wo Me Bilkul Bhool Gaya Fir Teesre Din Mujhe Yaad Aaya Or Jab Me Wo Rakam Us Jagah Lekar Pahucha To Huzoor Sallallaho Tala Alehe Wasallam Ko Us Jagah Paya Or Aap Ne Mujhse Sirf Itna Farmaya Ki Tumne Mujhe Mashakkat Me Daal Diya Kiyu Ki Teen Din Se Me Isi Jagah Tumhara Intezaar Kar Raha Hu.. 

3. Amaanat Ki Adaayegi :–  Amaanat Ki Adaayegi Farz Hai Or Baal Baraber Bhi Kisi Amaanat Me Khayanat Karna Haraam Or Gunah-E-Kabira Hai Quran Ka Farmaan Hai Ki ” Yaani Apni Amaanato Me Jaan Bhujkar Khayanat Na Karo “… 

Yaad Rakho Ki Amaanat Sirf Samaan Or Maal Ki Hi Nahi Hoti Balki Tumhe Kisi Baat Ka Ya Raaz Ka Ameen Bana De To Wo Baat Or Raaz Bhi Amaanat Hai Isme Bhi Khayanat Haram Wa Gunah-E-Kabira Hai.. Maslan Miya Biwi Bawaqte Mubasharat Tanhaai Me Kuch Kehte Ya Karte Hai Is Maamle Me Aurat Mard Ke Or Mard Aurat Ka Ameen Hai Ager Aurat Ya Mard Ne Apne Raazo Ko Faash Ker Diya To Amaanat Me Khayanat Karne Ka Gunah Lazim Hoga..  

4. Shramgaho Ki Hifazat :– Iska Matlab Yeh Hai Ki Zinakaari Se Bachne Ka Ahad Karle Or Hargiz Hargiz Apni Sharamgaho Ko Is Gunah-E-Azeem Se Aaluda Na Kare Balki Hamesha Apni Sharamgaho Ki Hifazat Karte Rahe..  

5. Nigaaho Ko Neechi Rakhna :– Isse Muraad Yeh Hai Ki Jin Cheezo Ko Dekhna Shariyat Muthara Ne Haram Karar De Diya Hai Hargiz Un Per Kabhi Nazar Na Dale Balki Apni Nigaaho Ko Neechi Rakhe Taaki Haram Chezo Per Nazar Na Pad Sake Maslan Gair Marham Aurto Ko Dekhna Ya Naach Dekhna Ya Cinema Wagerah Pe Behayai Ki Tasweere Akhlaak Ko Kharab Karne Wale Manazir Dekhna, Yeh Sab Haram Hai Or In Sab Maharim Se Apni Nigaaho Ko Neechi Rakhna Laazim Wa Amal Hai..  

6. Haatho Ko Roke Rakhna:– Iska Matlab Yeh hai Ki Musalman Apne Har Aja We Apne Badan Ki Boti Boti Per Control Rakhe Ki Hargiz Usse Koi Burai Or Khilafat-E-Shariyat Kaam Na Hone Paye Haath Ko Roke Rahna Ka Yeh Matlab Nahi Ki Haatho Ko Sirf Gunah Or Burai Se Bachai  Rakhe Or Badan Ke Dusre Aaza Ko Azaad Chor De Chuki Insan Ka Zadatar Kaam Haatho Se Hi Anjaam Paate Hai Isliye Misaal Ke Tor Per Is Hadees Me Hatho Ko Roke Rakhne Ka Zikr Aaya Hai Lakin Huzoore Akram Sallallaho Alehe Wasallam Ki Muraad Yahi Hai Ki Musalman Apne Har Aja Ko Hunaaho Se Roke Rakhe Chunache Quran-E-Majeed Me Rabbul Aalmeen Ka Farmaan Hai Ki…  

Tarjuma :– Kaan Ankh Dil Har Aja Se Iske Kaamo Ke Bare Me Qayamat Ke Din Pucha Jayega Or Uske Amaale Khair We Shar Ka Hisaab Liya Jayega..