5 Gunaah Aur Unke 5 Azaab–Hadees in Hindi
Bismillah Hirrahman Nirrahim
Hazrat Abdullah Ibne Abbas Radiallahu Ta’ala Anhuma Se Rivayat Hai Ki Unhone Farmaya Ki Jab Kisi Kaum Me Khiyanat Zahir Aur Khullam Khulla Hone Laghti Hai To ALLAH Ta'ala Us Kaum Ke Dil Me Uske Dushmano Ka Khauf Daal Deta Hai Aur Jab Jis Kaum Me Zinakari Fail Jati Hai To Us Kaum Me Bakasrat Maut Hone Lagti Hain Aur Jo Kaum Naap Taul Me Kami Karne Lagti Hai To Us Kaum Ki Rozi Kaat Di Jati Hai. Aur Jo Kaum Nahak Faisala Karne Lagti Hai To Us Kaum Me Khoon Rezi Failane Lagti Hai Aur Jo Kaum Ahad Shikani Aur Bad Ahadi Karne Lagti Hai To Us Kaum Par Uske Dushman Ko Ghalib Wa Musallat Kardiya Jata Hai.
Sharhe Hadees – Jis Tarah Dawao Aur Ghizao Me Allah Rabbul Izzat Ne Kism Kism Ki Taasiraaat Paida Farmayi Hain Ki Zahar Maar Dalta Hai. Tiryaak Zahar Ke Asraat Ko Zail Kar Deta Hai. Baaz Ghizaye Sehat Ko Barbaad Kardeti Hain Aur Baaz Ghizaye Tandurusti Badhati Hain. Isi Tarah Insan Ke Akwaal Wa Afzaal Me Se Kism Kism Ki Taseerat Rakh Di. Maslan Apki Gali Duniya Bhar Ke Insano Ko Apka Dushman Bana Deti Hai. Aur Aapki Dua Duniya Bhar Ko Aapka Dost Bana Deti Hai. Isi Tarha Agar Aap Kisi Ko Mukka Dikhaye Ge To Wah Aap Par Gazab Naak Ho Jata Hai Aur Ager Aap Kisi Ke Aage Hath Jode To Wah Aap Par Raham Dil Ho Jata Hai.
Isi Tarah Samjh Lijiye Ki Insan Ke Har Kaul We Amal Me Kism Kism Ki Taseere Aur Tarah Tarah Ke Asraat Paida Farmaye Hain. Naik Amaal We Ache Akwal Ki Taseerat Wa Asraat Bhi Ache Hote Hain. Aur Bure Aamaal Par Bure Akwaal Ki Taseerat Wa Asraat Bhi Bure Hua Karte Hain.
Huzoore Akram Sallallahu Ta’ala Alahi Wasallam Ne Is Hadees Me 5 Bure Aamaal Wa Unki Buri Taseero Ko Bayan Farmaya Hai.
• Khiyanat Ki Taseer Yeh Hai Ki Jo Kaum Amaanat Me Khayanat Karne Lagegi To Wo Kaum Apne Dushmano Se Khof, Darpok Aur Buzdil Ho Jayegi.
• Aur Jo Kaum Zinakari Ki Lanat Me Giraftar Ho Jayegi. To Us Kaum Par Tarah Tarah Ki Balaye Bimariyan Aur Wabaye Ayengi. Aur Bakasrat Log Marne Lagenge. Baaz Buzurgo Ne Farmaya Hai “Jaha Zina Waha Fana”
• Aur Jo Kaum Naaptol Me Kami Karne Lagegi To Uska Yah Asar Hoga Ki Unki Roziyo Ki Barkat Kat Jayegi. Wah Umar Bhar Rozi Kamane Ke Liye Dar Badar Ki Thokare Khate Firenge. Aur Hazaro Lakho Kamaynge Bhi Magar Unke Dil Ko Chain Aur Rooh Ko Sukoon Aur Daulat Se Karar Nahi Hasil Hoga. Aur Kuch Pata Nahi Chalega Ki Daulat Kaha Se Aayi Aur Kidhar Chali Gai?
• Aur Jo Kaum Nahak Faisala Karne Ki Khoogar Ho Jayegi To Us Gunah Ka Asar Yah Hoga Ki Us Kaum Me Katl Wa Khoon Rezi Fail Jayegi. Aur Rozana Raat Din Har Taraf Katl Hote Rahenge.
• Isi Tarah Jo Kaum Ahad Shiakni Aur Bad Ahdi Ki Raah Par Chal Padegi. Us Kaum Ki Izzat Wa Ikbaal Aur Uski Saltanat Ke Jaah Wa Jalal Ka Khatma Ho Jayega. Us Kaum Par Uske Dushmano Ka Ghalba Wa Iqtidaar Ho Jayega.
Chunki Un Gunaho Ki Yah Taseerat Hain Aur Koi Cheez Bhi Apna Khalki Asar Dikhaye Bina Nahi Rah Sakti. Lihaza Gunaho Ke Wahi Asraat Honge Jo Upar Bayan Kiye Gaye Hain. Aag Par Ungali Rakh Kar Laakh Chillaye Magar Ungali Zarur Jal Jyegi Kyuki Aag Ki Taseer Hi Hai Jala Dena.
Wajeh Rahe Ki Un Gunaho Ka Yah Azaab Sirf Duniyawi Azaab Hai. Jo Ki Is Hadees Me Diya Gaya Hai Baki Akhirat Ka Azaab Uske Alaawa Hai. Aur Azzbe Jahannam Hai.